Општина Делчево и месните заедници продолжуваат со конкретни активности насочени кон унапредување на животната средина, зачувување на јавниот простор и подобрување на квалитетот на живот на граѓаните.
Во село Габрово, претставници на Месната заедница, заедно со лица ангажирани преку Програмата за извршување јавни работи на Општина Делчево, реализираа заедничка акција за чистење на јавната површина околу селската џамија. Просторот беше исчистен од отпад и дивоизрасната вегетација, со што значително се подобри изгледот и функционалноста на оваа локација, која претставува и значаен историски споменик во селото. Акцијата беше иницирана од Советот на МЗ Габрово и е дел од приоритетните активности за создавање почиста и поздрава животна средина.
Градоначалникот Гоцевски ја истакна важноста на ваквите иницијативи, нагласувајќи дека тие се пример како граѓанската активност, организирана преку месните заедници, може да резултира со брзи и ефикасни решенија, со поддршка од Општината.
Паралелно со овие превентивни и уредувачки активности, Општина Делчево и надлежните служби покажаа висока подготвеност и во справување со вонредни состојби. Во текот на ноќта беше запалена градската депонија, при што, имајќи ги предвид временските услови, постои основано сомнение дека станува збор за намерно палење од човечки фактор. По пријавата, надлежните служби веднаш интервенираа, а со навремена и координирана акција пожарот беше локализиран и целосно изгаснат, со што беше спречена поголема материјална штета и потенцијална опасност по здравјето на граѓаните и животната средина.
Општина Делчево апелира до граѓаните за одговорно однесување и активно вклучување во заштитата на животната средина, истакнувајќи дека само со заедничка грижа, превенција и брза реакција може да се обезбеди чиста, уредена и безбедна средина за сите.