Со поддршка од истакнати стопанственици кои живеат во Делчево, но и надвор од градот, како и од поединци кои оставиле значаен белег во развојот и афирмацијата на Делчево, годинава ќе се одржи чествувањето на православниот христијански празник Св. Богојавление – Водици. За присутните ќе бидат обезбедени топли напитоци, а предвидени се и други активности за што дополнително ќе информираме.
Во Делчево привршуваат подготовките за традиционалното одбележување на празникот, кој, почитувајќи ја вековната традиција, во понеделник, 19 јануари, ќе започне во градската црква „Успение на Пресвета Богородица“ со света архиерејска литургија во чест на празникот, со почеток во 08:00 часот, а со која ќе чиноначалствува Неговото преосвештенство, епископот г. Марко.
Светата литија ќе започне во 10:00 часот од градската црква во Делчево и ќе се движи до мостот на реката Брегалница, каде ќе биде донесен светиот крст. Во 10:30 часот ќе се одржи чинот на осветување на водите на реката Брегалница. Според информациите од Делчевската Парохија и Делчевско-каменичката епархија веќе е во тек пријавувањето на момчињата кои ќе скокнат во водите на реката Брегалница по светиот крст.
По традиција, по чинот на осветувањето на водите, светиот крст ќе биде положен пред иконостасот во градската црква „Успение на Пресвета Богородица“ во Делчево.
По повод празникот, во градскиот парк ќе биде организирана пригодна прослава со учество на локални угостители.
