Општина Делчево започнува со процес за имплементација на нова административнo-дигитална платформа наречена „Смарт Делчево”.
Оваа платформа според јавно објавената информација на општинската веб страна подразбира воведување нов јавен административен и дигитален систем за поднесување, следење на текот и реализацијата на предлози, иницијативи и идеи од граѓаните, месните и урбаните заедници и граѓанскиот и бизнис– секторот преку кој граѓаните ќе имаат увид во текот на секоја иницијатива/барање/проблем/предлог/идеја.
Платформата ќе биде усогласена со актуелната позитивна законска регулатива, внатрешните процедури, протоколите и постапките за сите функционалности на Општина Делчево.
Целта на оваа дигитална јавна интернет алатка е зголемена транспарентност и ефикасност при постапувањето со пријавување, следење и брзо решавање проблеми под ингеренции на ЕЛС Делчево, ЈКП „Брегалница” Делчево, ТППЕ Делчево, преку која граѓаните ќе може да го следат текот и исходот од решавање на секој пријавен проблем.
Градоначалникот Гоцевски истакна дека веќе се спроведени активности за воспоставување на оваа нова платформа којашто значително ќе го подобри целокупното работење на општинската администрација и што е најважно ќе обезбеди брзи и ефикасни услуги кон граѓаните и стопанството.
–Овој иновативен проект се реализира како дел од мојата Програма за работа којашто доби недвосмислена поддршка од граѓаните на локалните избори минатата година, нагласи Гоцевски.