Холивудскиот актер Кевин Спејси го прослави својот 67-ми роденден во Дубровник. Прославата се одржа во неделата вечер во ресторанот „Прото“, каде што актерот вечераше во друштво на пријатели, меѓу кои и хрватскиот режисер Јаков Седлар, негов долгогодишен пријател и соработник, пишува Dubrovnik Daily.
View this post on Instagram
Спејси, кој моментално е на хрватскиот брег, за прославата избра ресторан во Дубровник познат по своите морски специјалитети и автентична локална гастрономија. Се вели дека актерот уживал во понудата на ресторанот и во опуштената атмосфера.
Ресторанот „Прото“ им се заблагодари на актерот и неговата компанија за посетата.
Ова не е првпат актерот да го прослави својот роденден во Дубровник. Тој го посети градот и пред 17 години, кога таму го прослави својот 50-ти роденден.
Кевин Спејси е американски актер и продуцент, роден на 26 јули 1959 година во Саут Оринџ, Њу Џерси. Тој е еден од најпознатите актери на својата генерација и освои два Оскари – за споредна улога во филмот „Вообичаените осомничени“ од 1995 година и за главната улога во филмот „Американска убавина“ од 1999 година. Тој исто така играше значајни улоги во филмовите „Se7en“, „L.A. Confidential“ и „K-PAX“, додека е особено познат на телевизиската публика по улогата на Френк Андервуд во серијата „Куќа од карти“.
Неговата кариера нагло запре во 2017 година, откако се појавија обвинувања за сексуално несоодветно однесување. Набрзо беше отстранет од серијата „Куќа од карти“, а неговите веќе снимени сцени во филмот „Сите пари на светот“ беа преснимени со Кристофер Пламер.
На кривичен судски процес одржан во 2023 година во Обединетото Кралство, Спејси беше ослободен од сите обвиненија. Во Соединетите Американски Држави, некои обвиненија и тужби беа отфрлени или повлечени, а во граѓанска постапка покрената од актерот Ентони Рап, поротата го прогласи за невин. Некои други граѓански спорови завршија со спогодби.
фото/Depositphotos