Институтот за јавно здравје (ИЈЗ) ги повика граѓаните да бидат особено внимателни за време на топлотниот бран што ќе трае до 7 август и да ги почитуваат препораките за заштита од високите температури, особено во периодот од 11:00 до 17:00 часот, кога ризикот од изложување на сонце е најголем.
Од ИЈЗ предупредуваат дека кога температурата на воздухот се приближува или ја надминува нормалната телесна температура, организмот потешко се лади, а високата влажност дополнително го отежнува испарувањето на потта. Тоа може да доведе до прегревање на телото и појава на симптоми како слабост, вртоглавица, гадење, прекумерно потење, сува кожа и мускулни грчеви.
Во потешки случаи може да дојде до сончев удар, кој се манифестира со многу топла и сува кожа, престанок на потење, конфузија, забрзано чукање на срцето, отежнато дишење, губење на свеста и други сериозни последици.
Најризични категории се лицата постари од 60 години, децата, бремените жени, лицата со хронични заболувања, како и работниците кои работат на отворено.
ИЈЗ препорачува граѓаните да избегнуваат директно изложување на сонце во најтоплиот дел од денот, да носат лесна и светла облека, капа и очила за сонце, да престојуваат во разладени простории и редовно да внесуваат доволно течности, пред сè вода. Се советува да се избегнуваат алкохол, пијалоци со кофеин, како и тешка и висококалорична храна.
Дополнително, Институтот предупредува никогаш да не се оставаат деца, стари лица или домашни миленици во затворено возило, бидејќи температурата во автомобилот за кратко време може да достигне опасно високо ниво.
Лицата со хронични заболувања треба редовно да ја земаат пропишаната терапија и при каква било промена на здравствената состојба да се консултираат со својот матичен лекар.