Саудиската противвоздушна одбрана пресретнала и уништила дрон на Хутите јужно од Мека, пред тој да навлезе во забранетиот воздушен простор над светиот град, според портпаролот на воената коалиција предводена од Саудиска Арабија, која се бори против групата поврзана со Иран во Јемен.
Безбедноста на двете најсвети места во исламот и на аџиите претставува црвена линија, изјави портпаролот на коалицијата, Турки ал-Малки, рано утрово, додавајќи дека коалицијата ќе преземе неопходни мерки за одвраќање против Хутите.
Мека, дом на светилишта важни за муслиманите ширум светот, е најсветиот град во исламот и центар на годишниот аџилак, еден од петте столбови на исламот, на кој секоја година одат милиони муслимани.
Малки го опиша инцидентот како втор обид на Хутите да ја нападнат Мека, по она што коалицијата го нарече лансирање балистичка ракета во јули 2017 година.
Претставник на Хутите во средата го отфрли ова тврдење, а портпаролот Хазем ал-Асад напиша на платформата X: „Тврдењата за напади врз Мека се истрошена лага што се користела и претходно и веќе никого не залажува“.
Организацијата за исламска соработка го осуди она што го нарече „гнасен“ напад врз светиот град на исламот, обвинувајќи ги Хутите. Групацијата – составена од 57 земји со мнозинско муслиманско население – ја осуди „тековната агресија врз Кралството Саудиска Арабија“.
Саудиска Арабија во вторникот издаде безбедносни предупредувања за делови од земјата, вклучително и за Мека и други градови, по серијата напади во текот на неделата од страна на борци поврзани со Иран, кои дополнително го вовлекоа Кралството во конфликтот на Блискиот Исток.
Американската амбасада издаде препорака да се преиспита патувањето во Саудиска Арабија по предупредувањата за Мека и други области поради нападите на Хутите. Во препораката се предупредува на „ризик од напади со ирански дронови и ракети врз американски интереси, вооружен конфликт, тероризам, забрани за напуштање на земјата и локални закони поврзани со активности на социјалните мрежи“, додавајќи: „Не патувајте до границата со Јемен поради заканата од тероризам“. Хутите презедоа контрола врз делови од јеменскиот брег на Црвеното Море што гледаат кон Баб ел-Мандеб – еден од најважните поморски теснеци во светот – со што го загрозуваат саудискиот извоз на нафта пренасочен од теснецот Хормуз.
Во текот на изминатата недела, групата најави неколку големи напади врз Саудиска Арабија, вклучително и напади врз воздухопловна база во понеделникот, за кои тврдеше дека се одмазда за воздушните напади врз Јемен.