Граѓаните на кои им недостигаат најмногу две години стаж за да го исполнат законскиот услов од најмалку 15 години стаж би можеле да добијат можност самостојно да го надополнат периодот што им недостига и да остварат право на старосна пензија.
Можноста ја најави министерот за социјална политика Ѓоко Велковски. Според предложеното решение, оваа опција би важела за лицата кои имаат најмалку 13 години стаж, ги исполнуваат условите за старосна пензија и повеќе не се активни осигуреници.
Предвидено е стажот да може да се докупи за период од најмногу 24 месеци. Граѓаните сами би ги уплатувале придонесите за месеците што им недостигаат.
Висината на уплатата ќе зависи од бројот на месеци што треба да се надополнат, а придонесите би се пресметувале врз основа на половина од просечната плата од претходната година.
По уплатата на придонесите, висината на пензијата би се утврдувала според редовната законска формула, односно врз основа на вкупниот пензиски стаж и остварените примања во текот на работниот век.
Законското решение сè уште е во фаза на разгледување во Владата. Доколку биде усвоено, лицата на кои им недостигаат до две години стаж би добиле можност да го надополнат потребниот период и да го исполнат условот за стекнување право на пензија.
…