Цените на нафтата и денеска продолжија да паѓаат, откако Саудиска Арабија ги обнови операциите на еден клучен нафтовод, а влијаеја и надежите за дипломатско решение на војната меѓу САД и Иран.
Фјучерсите на суровата нафта од типот „Брент“ паднаа за 1,09 долари, односно 1,1%, на 98,16 долари за барел, додека фјучерсите на нафтата од типот WTI се намалија за 1,50 долари, или 1,67%, на 89,01 долари за барел.
Двата вида договори бележат пад шест сесии по ред, достигнувајќи најниски нивоа во последните две недели.
Иако американскиот претседател Доналд Трамп во вторникот предупреди дека би можел да го уништи Иран, тој исто така изјави дека неговите пратеници, Стив Виткоф и Џаред Кушнер, воделе продуктивни разговори со иранските посредници за ставање крај на војната.
„Мислам дека постои силен импулс за постигнување договор“, рече Трамп.
Оптимизмот во врска со подобреното снабдување и напорите за завршување на конфликтот, кој трае речиси седум месеци, придонесоа референтната нафта „Брент“ во вторникот да падне и да ја затвори трговијата под 100 долари за барел, првпат по 8 септември.
„Пазарот моментално има поконструктивен став кон состојбата со глобалното снабдување со нафта отколку пред неколку недели“, изјави Тим Вотерер, главен аналитичар во „KCM Trade“.
„Средбата меѓу американската и иранската делегација во Њујорк им даде трошка надеж на трговците. И покрај продолжената остра реторика, вклучително и заканите за уништување, пазарот одлучува да ја вкалкулира можноста за преговори.“ Во вторникот, Саудиска Арабија повторно го пушти во употреба нафтоводот „Исток-Запад“ што води кон Црвеното Море, според информации од три извори запознаени со ситуацијата, при што се забележуваат знаци за зголемен проток на нафта од Блискиот Исток.
Нападите со беспилотни летала, за кои Саудиска Арабија ги обвини ирачките милиции, го принудија Кралството да го затвори нафтоводот на 11 септември, со што беше запрен утоварот на сурова нафта во пристаништето Јанбу.
Откако војната меѓу САД и Израел со Иран го попречи протокот на нафта од Саудиска Арабија и нејзините соседи од Заливот низ Ормускиот теснец, Ријад го користи овој нафтовод за пренасочување на околу 4 милиони барели дневно – што претставува околу 4% од глобалното снабдување – кон Јанбу.
Во вторникот, Саудиска Арабија исто така понуди поголеми количини нафта на азиските рафинерии за преземање од локации надвор од теснецот.
И Ирак го зголемува извозот на нафта, изјави во вторникот ирачкиот министер за нафта, Басим Мохамед. Земјата извезува повеќе од 3 милиони барели дневно и очекува да го зголеми извозот преку Турција на над 600.000 барели дневно, рече тој.
Привремените податоци од компаниите за следење на поморскиот транспорт „Вортекса“ и „Кплер“ покажаа дека ирачкиот извоз на сурова нафта во август изнесувал 2,3 милиони, односно 2,17 милиони барели дневно; тоа претставува зголемување во однос на нивото од јули, но сепак е под нивото од пред војната, кога извозот изнесувал 3,7 милиони, односно 3,362 милиони барели дневно.
Дополнителен притисок врз цените на нафтата во насока на намалување извршија и индустриските податоци кои покажаа дека залихите на сурова нафта во САД се зголемиле за 1,8 милиони барели во неделата што заврши на 18 септември.
