Мајкл Даглас ѝ упати емотивна роденденска честитка на сопругата Кетрин Зета-Џонс, со која го дели истиот роденден – 25 септември. Тој наполни 82 години, а таа 57.
По тој повод, Даглас објави извадок од своите претстојни мемоари „One Helluva Ride“, во кои пишува и за нивниот речиси 26-годишен брак.
„Никогаш претходно не сум се заљубил во некого кого сум го гледал на филмското платно. Сè додека не ја запознав Кетрин. Беше волшебна на начин што ја надминуваше физичката убавина. Бев сигурен, како никогаш во животот, дека таа е вистинската личност за мене“, напиша актерот.
Во посебна порака додаде дека тоа е момент кој човек го доживува само еднаш во животот – кога без сомнение знае дека му е судено да биде со некого.
Зета-Џонс, пак, му возврати со честитка на Instagram, истакнувајќи дека делењето на истиот роденден со него ѝ е особено драго.
Двојката се запозна во 1998 година на филмскиот фестивал во Довил, а се венча во 2000 година. Имаат две деца – синот Дилан и ќерката Керис, а минатата година прославија 25 години брак.