Два брода беа погодени од дронови во близина на бугарскиот брег на Црното Море, при што еден од нив потона – ова е втор таков инцидент во рок од една недела, изјави во вторникот премиерот Румен Радев.
Бродот „Челзи 3“, кој е во украинска сопственост и плови под малтешко знаме, бил погоден од три дрона и оштетен на околу 18 наутички милји од бугарскиот брег, околу 01:30 часот по полноќ , рече Радев. Неговиот екипаж седум Украинци и осум Азербејџанци бил спасен. Пет члена на екипажот добиле медицинска помош, но никој не бил сериозно повреден.
Спасен бил и еден член на екипажот од потонатиот брод, додаде Радев.
„Ова е апсолутно неприфатливо – уште еден напад во непосредна близина на бугарските територијални води“, рече Радев во телевизиско обраќање.
„Треба да разговарам со генералниот секретар на НАТО, Марк Руте.“
Радев изјави дека нема јасни докази за тоа кој го извршил нападот, но дека „исходот ѝ оди во прилог на Руската Федерација“, додавајќи дека ќе го повика рускиот амбасадор на разговор во врска со инцидентот.
Бугарија не граничи ниту со Украина, ниту со Русија, но како членка на НАТО зазема стратешка позиција на Црното Море, каде што и двете земји имаат големи пристаништа. Постои зголемена загриженост поради хибридните напади со дронови од страна на Русија додека таа води војна во Украина.
