Првите локални избори во независна Македонија се одржуваат во ноември 1996 година, а се спроведуваат во 123 општини и на ниво на Град Скопје. На овие „пионерски “ избори најголем број 54 градоначалнички места освојува СДСМ, на второ место со 30 е ВМРО-ДПМНЕ, а на трето место со 20 градоначалнички позиции е тогашната партија од албанскиот блок, ПДП. Социјалистичката партија добива дури 10 градоначалнички места, а по едно имаат и етничките Турци, Роми и Срби.
Во септември 2000-та се одржуваат вторите локални избори – повторно во 123 општини и Град Скопје. Овие избори ќе донесат и промена на политичките сили на локално ниво – ВМРО-ДПМНЕ ќе освои 59 градоначалнички позиции, СДСМ ќе „падне“ на 32, а ПДП ќе го зголеми бројот на 23 избрани градоначалници.
Локални избори 2005 – ова се првите општински избори по спроведената територијална поделба на 84 општини и Град Скопје. Изборите беа спроведени во март. На овие избори за прв пат како политички играч настапува ДУИ, партијата на Али Ахмети и освојува 14 градоначалнички функции. Водечка партија е СДСМ со освоени 37, а зад неа е ВМРО-ДПМНЕ со 21 градоначалничко место. Овие избори се спроведоа под засилен мониторинг на меѓународните институции, а беа регистрирани и бројни нерегуларности.
Четири години подоцна, заедно со претседателските избори се одржуваат и Локалните избори 2009. Овие избори на ВМРО-ДПМНЕ ќе му донесат голема победа – со освоени 56 градоначалнички позиции додека за СДСМ ќе значат изборно фијаско, со само 7 градоначалници, што ја вброи партијата на трето место по освоени позиции, зад ВМРО-ДПМНЕ и зад ДУИ која извојува победа во 15 општини.
Локални избори 2013 година – во два изборни круга во март и април се спроведоа петтите по ред општински избори во независна држава. Според политичкиот контекст – тогашната опозициска СДСМ бараше и предвремени парламентарни избори, а претходница на локалните беше „црниот понеделник“, 24 декември 2012 година. На овој изборен циклус ВМРО-ДПМНЕ ги задржа сите 56 градоначалнички позиции, а СДСМ претрпе загуба со само 4 освоени градоначалници. ДУИ успеа да ја задржи доминацијата во 14 претходно освоени општини – со загуба на една позиција.
Октомври 2017-та. Се бираат градоначалници во 80 општини и Град Скопје. Листи со кандидати за градоначалници и советници поднеле 19 партии и коалиции, како и 64 групи избирачи. Со вкупно освоени 57 градоначалници СДСМ извојува голема победа откако на претходните локални избори се соочи со фијаско од само 4 освоени општини. Дебаклот го понесува ВМРО–ДПМНЕ – партијата се сведува од 56 на 5 освоени градоначалнички позиции. Се „стопи“ и доминацијата на ДУИ на 10 освоени општини.
Четири години подоцна , Локални избори 2021, октомври. Новиот изборен циклус донесе политички пресврт. Со освоени 42 градоначалници ВМРО-ДПМНЕ ја презема доминацијата, додека СДСМ се сведува на 16 градоначалници. На овие локални избори ДУИ освојува една општина плус, со што доминира во 11 локални самоуправи. Тогашните Алијанса на Албанците и Беса освојуваат по две општини, а ДПА останува без градоначалник.
Досегашниот распоред на политичките сили покажува дека во четири изборни циклуси на локално ниво победата ја понесува ВМРО-ДПМНЕ, додека во три СДСМ.