Голема полициска акција од синоќа се спроведува во Берово, Пехчево и Делчево. Информациите се дека се работи за разбивање на организирана криминална група која со години наназад вршела нелегална сеча на шуми, злоупотреба на службена положба, примање и давање поткуп, како и други тешки дела против животната средина.
Според засега неофицијалните информации, меѓу приведените се и актуелен директор на ЈП „Македонски шуми“ и актуелен началник во полицијата, како и повеќе полициски службени лица, шумски полицајци.
Информациите кои ги пренесоа дел од медиумите се дека меѓу приведените се и службено лице од подрачна единица на министерство за земјоделство, како и сопственици на правни субјекти.
Се сомничат дека систематски организирале нелегална сеча и транспорт на дрвна маса, која потоа преку коруптивни врски ја пласирале како легално исечена.
Од МВР најавија повеќе информации во текот на денот.