Советот на општина Делчево влегува во нова фаза на модерно и транспарентно функционирање, со започнување на процесот на дигитализација на својата работа. Како што информира претседателот на Советот, д-р Николчо Стојменовски, во наредниот период ќе се спроведува пилот-проект за воведување современ дигитален систем за работа на Советот.
Преку овој пилот-проект ќе се тестираат и унапредуваат дигиталните алатки, а по неговата успешна реализација, од почетокот на 2026 година, електронскиот начин на работа ќе стане официјална и стандардна пракса. Ова ќе следува по официјалното потпишување договор со фирмата која го обезбедува софтверот и системот за дигитализација.
Во рамки на новиот систем, наредните седници на Советот ќе се одржуваат електронски, што ќе овозможи поголема ефикасност, но и значително поголема отвореност кон јавноста.
Меѓу клучните новини што ги носи дигитализацијата се целосната транспарентност во гласањето, при што секој граѓанин ќе може во реално време да види како гласал секој советник по секоја точка од дневниот ред – дали гласал „за“, „против“, бил „воздржан“, „отсутен“, „се изземал“ или „не гласал“.
Дополнително, седниците ќе бидат отворени за јавноста, овозможувајќи им на сите заинтересирани граѓани да се вклучат и да ги следат во живо, без потреба од физичко присуство. Електронскиот дневен ред ќе биде однапред подготвен и јавно достапен, со што граѓаните навремено ќе можат да се информираат за темите што ќе се разгледуваат.
Како дел од системот ќе биде воспоставена и јавна електронска архива, преку која граѓаните ќе имаат постојан пристап до материјали од седниците, донесени одлуки, резултати од гласања, како и видео-записи од претходни седници.
„Овие промени имаат една цел – да го приближиме работењето на Советот до граѓаните, да ја зголемиме транспарентноста и да ја зајакнеме довербата меѓу избраните претставници и јавноста“, истакнува Стојменовски.
Со целосната примена на дигиталниот систем во 2026 година, општина Делчево има амбиција да стане пример за модерно, ефикасно и отворено локално управување, при што активното учество и интересот на граѓаните ќе имаат клучна улога во демократските процеси на локално ниво.