Со свечен историски час и низа пригодни обраќања, денеска во СОУ „Методи Митевски Брицо“ во Делчево беа одбележани 154 години од раѓањето на Гоце Делчев, со што официјално започна и манифестацијата „Гоцеви денови“, обновена по иницијатива на градоначалникот на Општина Делчево, Иван Гоцевски.
Настанот беше отворен со воведно обраќање на ученичката Јана Попова, која истакна дека Гоце Делчев не е само историска личност од минатото, туку симбол на визија, борба и непрекината љубов кон својот народ, чија мисла и денес претставува ѕвезда водилка.
Градоначалникот Иван Гоцевски, повикувајќи се на една од најпознатите мисли на Делчев, нагласи дека неговото дело и денес ја отсликува континуираната борба на македонскиот народ за самостојна и светски призната држава, посочувајќи дека наследството на Делчев е аманет и обврска и за институциите и за граѓаните.
Свое обраќање имаше и директорката на СОУ „Методи Митевски Брицо“, Марина Синадиновски, која изрази чест и задоволство што училиштето е дел од одбележувањето на овој значаен јубилеј.
„Одредени историски датуми се толку длабоко врежани во македонската историја што стануваат дел од генетскиот код на секој Македонец. Таков е и 4 февруари, датумот кога во 1872 година се роди стратегот на македонската револуционерна борба и великан на современата македонска историја – Гоце Делчев“, истакна Синадиновски.
Таа нагласи дека улогата на училиштето не е само да пренесува факти, туку да гради свест, вредности и љубов кон историјата, потенцирајќи дека делото на Делчев треба да се изучува како пример за храброст, пожртвуваност и борба за правда и слобода.
„Наше е преку истражувачки проекти, дискусии и отворени часови да им овозможиме на учениците активно да размислуваат, а ликот на Делчев да стане живо присуство меѓу нас. Кога учиме со разбирање и почит, ја продолжуваме неговата мисија – да создаваме образовани, свесни и одговорни млади луѓе“, порача директорката.
Историскиот час продолжи со излагања на професорите по историја проф. Спиридон Митевски, проф. Митко Антовски и проф. Билјана Петровска, кои од научен и едукативен аспект го претставија ликот и улогата на Гоце Делчев во македонската национална историја.
Настанот заврши со порака дека сеќавањето на Гоце Делчев не е само чин на почит, туку трајна обврска кон идните генерации и кон вредностите врз кои се темели македонската државност.
Со овој настан официјално започна иницијативата за возобновување на манифестацијата „Гоцеви денови“, која има за цел да го негува и афирмира ликот и делото на Гоце Делчев преку образовни, културни и научни содржини.