Во општина Пехчево започна асфалтирањето на локалниот пат кој ги поврзува селата Умлена и Робово, проект кој има за цел да ја подобри патната инфраструктура и да овозможи побезбедна и поефикасна комуникација за жителите од овој регион.
На увид на градежните активности денеска беше градоначалникот на општина Пехчево, Александар Китански, кој истакна дека реализацијата на овој проект претставува значаен чекор кон подобрување на условите за живот на локалното население.
„Со реконструкцијата и асфалтирањето на овој патен правец овозможуваме полесна комуникација меѓу населените места, подобра мобилност на граѓаните, како и олеснет транспорт и движење на стоки и добра“, посочи Китански.
Тој упати благодарност до премиерот на Република Македонија проф. д-р Христијан Мицкоски и министерот за транспорт и врски г-дин Александар Николоски за поддршката и обезбедените средства за реализација на проектот, нагласувајќи дека Владата продолжува да инвестира во развојот на локалната инфраструктура и подобрување на условите за живот во руралните средини.
Од Општината апелираат до граѓаните да се воздржат од движење по новоасфалтираните делници додека траат градежните работи и целосно да ја почитуваат поставената сообраќајна сигнализација, со цел безбедно и непречено одвивање на активностите на терен.
Проектот е финансиран од Владата на Република Македонија, а по неговото завршување се очекува значително да се подобри локалната патна поврзаност и секојдневното функционирање на жителите од овој дел на Малешевијата.
