Зетот на Доналд Трамп и негов пратеник, Џаред Кушнер, во неделата во Египет се состанал со политичкиот лидер на Хамас, во рамките на нов дипломатски обид да се постигне напредок во застојот околу примирјето во Газа. Кушнер во понеделник ќе се сретне со Бенјамин Нетанјаху, кој се соочува со притисок откако го одби новиот, 15-точковен патоказ поддржан од САД, пренесува „Гардијан“.
Како што пренесува медиумот, целта на разговорите е да се спаси планот според кој Хамас треба да се разоружа, а Израел да се повлече од палестинската територија разурната од војната.
Во прашање се животите на околу 2 милиони луѓе во Газа, како и обновата на густо населената енклава, која сега во голем дел е под контрола на израелските сили, повеќе од 10 месеци откако примирјето ги прекина главните воени операции.
Состанокот меѓу Кушнер, неговиот колега-пратеник Стив Виткоф и лидерите на Хамас во Египет минатата година помогна да се постигне примирјето, чиј напредок досега беше блокиран поради клучното прашање, разоружувањето на Хамас.
Повеќе од двочасовниот состанок во Египет со политичкиот лидер на Хамас, Калил ал-Хаја, го потврдија регионален претставник и претставник на Хамас. Двајцата зборувале под услов да останат анонимни, бидејќи немале овластување да разговараат со новинарите.
Кушнер бил еден од тројцата пратеници кои се сретнале со ал-Хаја. На состанокот присуствувале и претставници на земјите посредници — Египет, Катар и Турција.