Десетици илјади луѓе денес се собраа во центарот на Загреб на голем протест поради незаконското депонирање отпад во Госпиќ, како и поради пошироката загриженост за заштитата на животната средина во Хрватска, пренесува Хрватскиот медиум ХрватскаНедела.
Протестот под мотото „Оди за Лика, оди за Хрватска“ го организираше граѓанската иницијатива „Госпиќ е наш дом“.
Учесниците се собраа на плоштадот Крал Томислав, по што во колона се упатија кон плоштадот Бан Јосип Јелачиќ, каде што главната програма започна напладне. Демонстрантите носеа хрватски знамиња и транспаренти со барања за отстранување на отпадот и за побрза реакција од државните институции.
Организаторите нагласија дека протестот е граѓанска иницијатива, а не политички настан. На протестот говореа претставници на еколошки и на граѓански организации од повеќе делови на Хрватска, кои укажаа и на проблемите со отпадот и со животната средина надвор од Госпиќ.
Во центарот на протестот е депонијата во Госпиќ, каде што, според досегашните информации, биле закопани околу 33.000 тони опасен отпад.
Илјадници луѓе беа на главниот плоштад и извикуваа „Госпиќ, Госпиќ!“, додека организаторите ги презентираа своите барања. Тие бараат Владата во рок од 20 дена да претстави целосна програма за санација, со задолжителни рокови, а отпадот да биде отстранети во рок од три месеци.
Организаторите бараат и комуналната депонија Ракитовац да биде вклучена во хрватскиот план за управување со отпадот, како и долгорочен мониторинг на состојбата на животната средина со учество на независни експерти и независна проценка на ризиците за животната средина.
На национално ниво, иницијативата бара посилна правна заштита за заедниците погодени од еколошки проблеми и привремено запирање на увозот на отпад до натамошно известување.