Администрацијата на американскиот претседател Доналд Трамп најавува промена во пристапот кон Балканот, со поголем акцент на економската соработка, енергетиката, транспортот и стабилноста, а помалку на директното мешање во внатрешните политички прашања на земјите од регионот.
Ова го посочил заменик-помошникот државен секретар на САД за Балканот, Дениел Лотон, во сведочење пред Комитетот за надворешни работи на Претставничкиот дом, во период пред најавената посета на премиерот Христијан Мицкоски на Вашингтон.
Во американската визија за регионот, Македонија има значајно место. Лотон ја издвоил земјата како близок партнер на НАТО, која ги реализира своите стратегиски приоритети и напредува кон исполнување на обврските поврзани со инвестициите во одбраната.
Посебен акцент бил ставен на енергетската инфраструктура. Македонија се подготвува за поврзување со гасовод кој би овозможил транспорт на американски втечнет природен гас од Грција кон Србија, со користење на инфраструктурата поврзана со пристаништето Александруполи.
Паралелно се развиваат и транспортните коридори што ги поврзуваат регионот во правец север-југ и исток-запад. Соработката во овие области била потврдена и на Стратегискиот дијалог меѓу САД и Македонија одржан во април.
Американскиот пристап, според изјавите на Лотон, подразбира и намалено директно мешање во внатрешните политички прашања на балканските држави.
Говорејќи за ситуацијата во Босна и Херцеговина, Лотон посочил дека Вашингтон не сака прекумерно да интервенира во внатрешните прашања на суверените држави. Тој додал дека САД немаат намера да заземаат став за тоа кои балкански земји треба да станат членки на Европската Унија.