Претседателката на Европската комисија, Урсула фон дер Лајен, која денеска престојува во официјална посета на Скопје како дел од нејзината турнеја низ земјите од Западен Балкан, во Владата оствари средба со премиерот на Република Македонија, Христијан Мицкоски.
По средбата, тие одржаа заедничка прес-конференција на која премиерот посочи дека нејзиното искуство во регионот и континуираната посветеност на европската перспектива, тој високо ги цени.
Средбата ја оцени како отворена, содржајна и насочена кон прашањата кои директно ја определуваат европската иднина.
-Се разбира дека разговаравме за реформите, за динамиката на пристапниот процес, но и за предизвиците кои со години го оптоваруваат нашиот пат кон Европската Унија. Нашата определба како држава е јасна и останува непроменета. Сакаме да бидеме дел од Европската Унија и посветено работиме на таа цел. Истовремено, веруваме и дека дојде време овој процес да добие посилна политичка поддршка од сите европски институции. Нашата европска определба никогаш не била и нема да биде спорна. Она што денес го бараме е процес кој ќе биде фер и заснован на јасни правила. Ние ги завршуваме нашите обврски и спроведуваме реформи што се очекуваат од една земја, понекогаш на време, понекогаш малку и доцниме, но сепак ги завршуваме, како земја која што сака да стане членка на Европската Унија, рече Мицкоски.
Премиерот посочи дека со претседателката на ЕК разговарал отворено и за предизвиците што Македонија ги има во односите со источниот сосед.
-Нашата земја е тие прашања да се надминуваат низ дијалог, во добра волја и со взаемно почитување. Исто така на денешната средба зборувавме и јас тоа го напоменав дека очекуваме да биде вклучена и Европската Унија во овој процес. И не бараме од Унијата да завзема страна, бараме да помогне во создавање на услови за одржливо европско решение во кое договореното ќе биде јасно, обврските ќе важат за сите, а процесот на пристапување нема да биде отворен за нови билатерални условувања. Секое решение мора да создава сигурност дека со неговото исполнување се затвора една фаза и се отвора патот кон следната без простор за нови толкувања или дополнителни барања, рече Мицкоски.
Македонскиот премиер порача дека ако од нас очекуваат одлуки со долгорочни последици, тогаш оправдано е и ние како држава да очекуваме јасна европска перспектива за она што следува потоа.