Со света литургија во соборниот храм „Свети Климент Охридски“ во Скопје денеска беше одбележан Соборот на сите македонски светители. На богослужбата беше прославен и јубилејот на поглаварот на Македонската православна црква – Охридска архиепископија, г.г. Стефан: 40 години од неговата епископска хиротонија.
Литургијата ја предводеше архиепископот Стефан, а со него сослужуваа архиереи на МПЦ-ОА. Во обраќањето тој се наврати на годините во кои црквата, како што рече, се соочувала со отфрлање и непризнавање. Истакна дека со трпение и истрајност ја бранеле вистината за Охридската архиепископија и за МПЦ-ОА како нејзина канонска наследничка.
Архиепископот изрази благодарност за мудроста и силата со кои биле надминувани искушенијата. Тој ја спомена и 2022 година како период во кој, според неговите зборови, црквата наишла на љубов и разбирање во православниот свет.
Дел од пораката го посвети на образованието и духовниот развој. Потсети дека стекнувањето знаење само по себе не значи и духовна образованост, а оцени дека веронауката треба да добие посоодветно место во образовниот процес.
Г.г. Стефан бил хиротонисан за епископ на 12 јули 1986 година во храмот „Свети Димитриј“ во Скопје, како митрополит злетовско-струмички. За поглавар на МПЦ-ОА бил избран на 9 октомври 1999 година, а следниот ден бил востоличен како нејзин петти архиепископ.