Поранешниот градоначалник на Општина Центар и поранешен функционер на СДСМ, Саша Богдановиќ, формираше нова политичка партија – Српска демократска лига.
Богдановиќ на социјалните мрежи објави дека вчера во Македонската филхармонија се одржал Првиот изборен конгрес на новата партија. Меѓу гостите имало претставници на други политички партии и лица од јавниот живот во земјава, како и претставничка на Српската напредна странка (СНС) од Србија.
Невена Ѓуриќ, потпретседателка на Главниот одбор на СНС, била една од говорничките на конгресот, а Богдановиќ во објавата упатил благодарност за поддршката.
„Ова не е само нова политичка сила, туку претставува историска обнова на соработката и традицијата на првата Српска лига основана во Скопје уште во 1908 година. Со организираност, достоинство и единство, ќе го чуваме својот идентитет, истовремено почитувајќи го и идентитетот на другите!“, напиша Богдановиќ.
Делегатите на конгресот едногласно ја поддржале одлуката за формирање на Централниот и Надзорниот одбор на партијата, а го усвоиле и Предлог-договорот за коалиција.
Српската напредна странка е владејачка партија во Србија, која долги години беше предводена од Александар Вучиќ. Вучиќ сега е носител на листата за претстојните парламентарни избори во Србија, закажани за 25 октомври.
Во Македонија, како еден од главните поддржувачи на политиките на СНС и Вучиќ во изминатите години се посочува Иван Стоилковиќ, кој е претседател на Демократската партија на Србите во Македонија (ДПСМ).
Стоилковиќ околу 20 години беше пратеник во Собранието, а во 2024 година беше избран за вицепремиер и министер за односи меѓу заедниците во Владата на Христијан Мицкоски. По реконструкцијата на владиниот кабинет, тој премина во друг ресор и од јули 2026 година е министер за локална самоуправа.
Богдановиќ долги години беше функционер на СДСМ. Тој беше претседател на Општинската организација на СДСМ во Центар, а одреден период беше и директор на Јавното претпријатие „Паркинзи на Општина Центар“ (ПОЦ).
Од 2017 до 2021 година ја извршуваше функцијата градоначалник на Општина Центар.