Нов пожар се случил ноќеска во сервис за возила пред Пинтија, во местото Каменик, во кој имало повеќе автомобили, масла и други запаливи предмети, информираа од Дирекцијата за заштита и спасување. Огнот бил изгаснат во утринските часови, со осум возила на протипожарната бригада.
Градоначалникот на Кисела Вода Орце Ѓорѓиевски објави снимки од камера во близина на запалениот објект, на која се гледа лице како возилата ги полева со бензин и ги потпалува.
Од ДЗС информираа дека синоќа повторно бил предизвикан нов пожар и во депонијата Дрисла, но на сосема друго место, подалеку од местото кое беше активно претходните денови.
„На лице место веднаш се упатија скопските пожарникари кои започнаа со гаснење но поради спецификата на пожарот беше потребно истовремено затрупување на опожарената површина. Се активираа градежните машини кои веќе беа таму и пожарот беше изгаснат за помалку од еден час“, информира директорот Стојанче Ангелов.