Советот на Општина Делчево од денеска официјално ја пушта во целосна функција новата дигитална платформа opstinskisovet.mk, со што четвртата редовна седница на Советот ќе биде првата електронска седница во историјата на општината.
Како што информира претседателот на Советот на Општина Делчево, Николчо Стојменовски, платформата е ставена во употреба по успешно спроведената обука на советниците и административниот тим и овозможува целосно дигитално водење на постапката, електронско доставување и објавување на материјалите, електронски дневен ред и електронско гласање.
– Со оваа платформа обезбедуваме целосна транспарентност, бидејќи сите документи, предлог-одлуки, извештаи и записници ќе бидат јавно достапни во реално време, како на платформата, така и на официјалната веб-страница на општината, www.delcevo.gov.mk, изјави Стојменовски.
Тој нагласи дека дигитализацијата значително ќе придонесе за поголема ефикасност во работата на Советот, намалување на трошоците за печатење и дистрибуција, како и побрзо и пофлексибилно функционирање, особено во услови кога е можно одржување електронски седници.
Дополнително, преку платформата се овозможува и лесен пристап за граѓаните, кои ќе можат да се најават како гости, да ги прегледуваат материјалите, да ги следат седниците и навремено да се информираат за донесените одлуки.
– Ова е важен чекор кон модерна и дигитална локална самоуправа, во согласност со националните политики и заложбите за отворена и одговорна институција, истакна претседателот на Советот.
Од Општина Делчево информираат дека седниците и понатаму ќе се пренесуваат во живо преку официјалните канали на општината, а граѓаните се повикани уште од утре да ја посетат платформата opstinskisovet.mk и да се регистрираат како гости.