Хутите од Јемен, поддржани од Иран, тврдат дека во утрово нападнале два саудиски танкери за нафта во Црвеното Море, откако објавувија поморска блокада на саудиските бродови. Сателитски снимки од НАСА го покажуваат танкерот со саудиско знаме „Енцелија“ како гори во Црвеното Море.
Енцелија беше таргетирана додека пловеше во Црвеното Море, предизвикувајќи пожар на предниот дел на бродот, објави Саудиската државна новинска агенција, цитирајќи неименуван службеник во Генералниот транспортен орган. „Сите членови на екипажот се безбедни“, се вели во извештајот.
Операциите за поморска трговија на Велика Британија објавија дека танкер бил погоден од непознат проектил 70 наутички милји југозападно од градот Ал Шукаик во Саудиска Арабија, што предизвика пожар на бродот. Локацијата што ја дадоа се совпаѓа и со светлата точка видена на сателитските снимки и со позицијата што ја емитуваше Енцелија.
Портпаролот на војската на Хутите, Јахја Сари, изјави дека тие ќе продолжат со своите поморски операции против Саудиска Арабија и ќе продолжат со спроведување на равенката опсада за опсада, според новинската агенција Ројтерс.
Додека САД и Иран продолжуваат да разменуваат секојдневни напади, Техеран и Вашингтон исто така се вклучени во ескалирачка војна на зборови, при што лидерите од двете страни се закануваат дека ќе одговорат на какви било напади со поагресивен одговор.
„Нашата одбранбена доктрина е јасна: око за око“, рече иранскиот министер за надворешни работи, Абас Арагчи, во објава на X доцна во среда по локално време.
„Секоја агресија против Иран, вклучително и нашата инфраструктура, ќе предизвика моќен и решителен одговор“, додаде тој.
Коментарите на Арагчи дојдоа откако американскиот претседател Доналд Трамп во среда изјави дека САД ќе бомбардираат и уништат еден мост или електрана секој пат кога Иран ќе напаѓа брод што транзитира низ Ормускиот теснец, вклучително и оние во близина или во иранската престолнина, Техеран.
Трамп претходно се закани дека ќе напаѓа иранска цивилна инфраструктура – што може да се смета за воено злосторство – вклучително и во интервју за Фокс њуз минатата недела кога рече дека САД ќе ги нокаутираат иранските мостови освен ако не седнат на маса и не преговараат.
Висок ирански функционер предупреди дека Иран ќе возврати со удар врз инфраструктурата низ целиот регион.
„Доколку Американците целат на ирански мост или електрана, Иран ќе одговори со удар врз инфраструктурата и мостовите низ целиот регион, вклучувајќи ги и енергетските објекти во кои САД имаат интереси“, изјави неименуваниот функционер, според иранската полуофицијална новинска агенција Тасним.
Техеран, исто така, повтори дека ќе го оствари својот суверенитет над Ормускиот теснец, рече иранскиот воен функционер.
Иранските медиуми денеска информираа за американски напади во земјата. Иранската државна телевизија бјави дека две лица се убиени, а најмалку 11 други се ранети во ракетен напад врз граничниот премин Шаламчех со Ирак. Во меѓувреме, локалните медиуми објавија дека имало напади врз воена локација во пристанишниот град Бушер, во близина на единствениот оперативен комерцијален нуклеарен реактор во Иран, според Ројтерс.