Руски дронови погодија преполн трговски центар во централна Украина, при што загинаа 16 луѓе, a 130 се повредени во напад што Володимир Зеленски го осуди како „циничен и подмолен“, пренесува „Гардијан“.
Шефицата за надворешна политика на ЕУ, Каја Калас, го осуди петочниот напад врз Криви Рих, родниот град на претседателот Зеленски, нарекувајќи го „терор по план“. Таа рече дека, кога министрите ќе се состанат во Ирска следниот месец, ќе предложи „најсеопфатни санкции против Русија од почетокот на војната“.
„Рускиот напад врз трговскиот центар ја покажува апсолутната и целосна изопаченост на војната што ја води Москва“, напиша Калас на X, тврдејќи дека Москва „сака украинските градови да станат ненаселиви“.
Нападот се случува во период кога Русија во последните месеци ги засили бомбардирањата врз украинските градови. Во одделен напад во јужниот регион Миколаив загинаа уште четири лица, меѓу кои и три деца, соопшти министерот за внатрешни работи Иван Виговски на Телеграм.
На видеата од нападот во Криви Рих, објавени на социјалните мрежи, се гледаат спасувачи како брзаат да им помогнат на повредените на улицата пред објектот, додека од зградата се шири густ чад.
Втор дрон удрил во покривот на објектот околу половина час по првиот напад — повторен удар за кој Зеленски во објава на X рече дека бил насочен кон „спасувачите кои пристигнале на местото“.
Украинските служби за вонредни ситуации првично соопштија дека во нападот загинале 15 лица, а 130 биле повредени, меѓу кои 23 деца.
Шефот на регионалната воена администрација на Днепропетровск, Олександар Гања, подоцна на Телеграм соопшти дека бројот на загинатите се зголемил на 16.