Од денеска, 6 септември, престануваат да важат привремените олеснувања при спроведувањето на Европскиот систем за влез и излез (EES), што може да предизвика нови гужви и подолги чекања на границите и аеродромите во Европската Унија.
Досега, во случаи на зголемен метеж, земјите-членки имаа можност привремено да го прекинат земањето отпечатоци од прсти и скенирањето на лицето за да се забрза протокот на патници. Со укинувањето на оваа можност, биометриските проверки повторно ќе мора целосно да се спроведуваат.
Иако од Европската комисија оценуваат дека EES во текот на летото генерално функционирал добро и носи значајни придобивки за безбедноста, авиоиндустријата и туристичките организации предупредуваат дека проверките значително го продолжуваат времето за обработка на патниците.
Според податоците од авиоиндустријата, проверката која претходно траела околу 20 секунди, со воведувањето на EES може да трае и до 90 секунди по патник. На големите аеродроми, меѓу кои Франкфурт, Минхен и Амстердам, времето на чекање веќе е подолго од минатата година, додека во најфреквентните периоди на одредени европски сообраќајни центри патниците чекаат и до два часа.
Туристичките здруженија бараат од Брисел да овозможи продолжување на привремените олеснувања најмалку до крајот на зимската сезона. Според нив, дел од аеродромите сè уште немаат доволно автоматизирани киосци и персонал за целосно непречено спроведување на новиот систем.
Најголеми последици се очекуваат за патниците кои во ЕУ пристигнуваат од земји кои не се членки на Унијата, особено во периодите со зголемен број патувања.
Со цел да се избегнат непотребни доцнења, патниците се советуваат да пристигнуваат порано на аеродромите и граничните премини и да бидат подготвени за подолга процедура при влез во ЕУ.