Случајот со Ива Михаилова, 23-годишната кочанчанка со македонско и бугарско државјанство, добива нова димензија. Додека против неа во Основниот суд во Кочани се води постапка поради тешка сообраќајна несреќа со смртни последици, бугарската влада продолжува дипломатски да се ангажира за неа, а во јавноста во последните денови излезе и информацијата дека македонските власти го бараат нејзиниот татко, Симеон Михаилов, кој е избеган во Бугарија.
Бугарската министерка за надворешни работи Велислава Петрова на 5 септември се сретна со мајката на Ива, Христина Михаилова, и порача дека Бугарија ќе ги вложи сите напори за „постигнување правда“ во случајот. Петрова изразила загриженост за здравствената состојба на Ива и за ситуацијата во која се наоѓа семејството, а според бугарското МНР, ја уверила мајката дека Софија продолжува да обезбедува поддршка и правна заштита.
„Ива не е сама и може да продолжи да смета на нашата поддршка“, е пораката што Петрова ѝ ја упатила преку нејзината мајка.
Против Ива Михаилова се води постапка во Основниот суд во Кочани за тешко кривично дело поврзано со безбедноста на сообраќајот.
Предметот произлегува од сообраќајната несреќа од октомври 2025 година, во која едно лице загина, а повеќе лица беа повредени, меѓу кои и Михаилова. Таа ја отфрла вината. Клучно прашање во постапката е утврдувањето на причините за судирот и движењето на возилата непосредно пред несреќата. На последното рочиште беа сослушувани сведоци и вешти лица, а одбраната ги оспорува наодите на обвинителството. До правосилна пресуда, Михаилова има статус на обвинета.
По несреќата, Михаилова добила со сериозни повреди на р’бетот, а нејзиното семејство тврди дека е потребна специјализирана медицинска интервенција во Бугарија.
Македонските судови досега не ѝ дозволија да ја напушти земјата додека трае постапката. Бугарската страна смета дека на нејзината државјанка мора да ѝ биде овозможено соодветно лекување и поради тоа случајот го подигна на дипломатско ниво.
Во меѓувреме, на 1 септември бугарските медиуми објавија дека Симеон Михаилов, таткото на Ива, по кого Македонија има распишано меѓународна потерница. Симеон Михаилов се бара врз основа на наредба на Основниот суд во Кочани за издржување казна затвор од 12 години и шест месеци за злосторничко здружување, насилство и обид за убиство. Тој во изјава за бугарските медиуми изјави дека се работи за политички мотивирана и криминална пресуда на македонските судови и дека и неговата ќерка е неправедно обвинета заради нејзиното бугарско државјанство.
Софија инсистира на правата и лекувањето на Ива Михаилова, а македонските институции инсистираат на независноста на судската постапка и мерките што се одредени за обвинетата.
Во меѓувреме, Бугарија очигледно нема намера да го затвори случајот. Петрова по средбата со мајката порача дека Софија останува „непоколебливо ангажирана“ за брзо и успешно завршување на случајот.
Следното рочиште во Кочани е закажано за 28 септември
Случаите на членовите на семејството Михаилови станува нова точка на тензии меѓу Скопје и Софија.