„Збогум, љубов моја! Овој пат засекогаш!“ – со овие емотивни зборови битолскиот пилот Васко Михалчев се прости од авионот со кој со години бил поврзан неговиот живот.
Михалчев објави фотографија покрај жолтиот авион, а моментот го овековечи и со бакнеж на пропелерот. Кратката порака на фотографијата остави простор за различни толкувања, но јасно ја покажува силната емотивна врска што ја има со летањето.
Битолскиот пилот е познат и по тоа што, иако бил во пензија, повторно се врати во кабината за да помогне во гаснењето на пожарите во земјата. Во 2024 година, заедно со Стоје Арсовски, повторно управуваше со противпожарните авиони „ер трактор“, а нивниот ангажман продолжи и во 2025 година.
Во услови на недостиг од обучен кадар, искуството на искусните пилоти беше особено значајно при воздушните интервенции во борбата со пожарите.
Воздухопловната приказна на Михалчев е неразделно поврзана со Битола и со аероклубот „Мирко Тодоровски“. На одбележувањето на 100-годишнината од клубот во 2025 година, тој раскажа дека неговото членство започнало уште во 1980 година.
Повеќе од четири децении посветени на летањето го одбележаа неговиот професионален и личен пат. Во текот на годините, покрај пилотската работа, бил ангажиран и како инструктор и механичар, помагајќи во одржувањето на авионите и зачувувањето на воздухопловната традиција во Битола.
Особено значајна била и неговата посветеност на младите пилоти. Михалчев повеќепати говорел за потребата од создавање нови генерации пилоти кои ќе ја продолжат традицијата на битолскиот аероклуб.