Шефот на македонската дипломатија денеска во Софија ќе се сретне со неговата бугарска колешка Велислава Петрова-Чамова. Средбата ќе се одржи на маргините на меѓународната конференција за Коридорот 8.
Средбата е на барање на македонската страна откако шефот на македонската дипломатија испрати барање за средба по посетата на претседателката на Европската комисија Урсула фон дер Лајен.
Премиерот Христијан Мицкоски во пресрет на средбата изјави дека само со разговор може да се надмине спорот и да се дојде до решение за земјава што поскоро да ги почне преговорите за влез во Европската унија.
Ќе видиме во кој формат и како ќе изгледа таа средба, дали ќе биде pull aside, дали ќе биде билатералка на маргините на Самитот за Коридорот 8, сепак е ова мултилатерален настан, да видиме како тоа домаќинот ќе го организира. Пораките наши се јасни дека само со дијалог можеме да дојдеме до решение од оваа состојба во која што во моментов се наоѓаме, дека ние сме за добрососедски односи и ние сакаме што побргу да ја реализираме нашата стратешка цел да бидеме дел од Европската унија, нешто што многу одамна го заслуживме, изјави вчера Мицкоски.
Во рамки на конференцијата, министерот Муцунски ќе се обрати на панелот на високо ниво „Геостратешки контекст на Коридорот VIII“, посветен на стратешкото значење на Коридорот во актуелните геополитички, безбедносни и економски услови. Во фокусот ќе биде неговата целосна реализација како заеднички стратешки интерес на земјите долж коридорот и на поширокиот европски простор.
Опозицијата не очекува ништо од денешната средба во Софија. Велат дека средбата не е потребна откако во петокот претседателката на ЕК го потврди македонскиот јазик и идентитет.
Зошто има потреба сега откако тоа е потврдено да одиме во Софија и да разговараме за Преговарачката рамка. Дали не е тоа напор наместо европеизација да прават билатерализација на процесот, дали тоа не е напор да отвораат и репреговараат веќе договорени гарантирани работи од преговарачката рамка. Од средбата ништо продуктивно не очекуваме, праша заменик-претседателката на СДСМ Фани Каранфилова Пановска.