Националната установа Гостиварски театар ќе учествува на седмото издание на Фестивалот на драма и театар на балканскиот културен простор „Театар на раскршћу“ во Ниш, Србија, со претставата „Хауситери“, по текст на Горјан Милошевски, во режија на Игор Ивковиќ. Изведбата е закажана за сабота, 10 октомври, во 18:00 часот, на Малата сцена на Народниот театар во Ниш, во рамките на придружната фестивалска програма.
Во претставата настапуваат Ирена Илиевска, Дарко Вељиќ, како гостин, и Ариан Ејупи, а сценографијата и костимографијата се на Ирена Боневска-Чаловска. Гостувањето пред нишката публика е можност Гостиварскиот театар да претстави современ македонски драмски текст и својата продукција во меѓународен фестивалски контекст.
„Хауситери“ е современа драма со елементи на комедија, која преку животот на една млада брачна двојка ги отвора прашањата за материјалната несигурност, контролата, надзорот и цената на стремежот кон подобар живот. Во средиштето се човечките односи изложени на притисок и изборите што луѓето ги прават кога егзистенцијалната потреба се судира со личното достоинство.
Низ хумор, напнатост и неочекувани пресврти, претставата ги испитува довербата и приватноста, како и границите меѓу влегувањето во туѓ дом и навлегувањето во туѓ живот. Режисерскиот пристап ја нагласува тенката линија меѓу комичното и вознемирувачкото: зад навидум апсурдните ситуации се откриваат осаменоста, класните разлики и стравот од губење на сопствената вредност во свет што постојано го проценува човекот според неговата корисност.
Фестивалот „Театар на раскршћу“, во организација на Народниот театар во Ниш, се одржува од 5 до 11 октомври 2026 година. Неговата мисија е да ја поттикнува меѓународната културна размена, да ја промовира театарската уметност на балканскиот културен простор и да создава услови за размена на идеи и сценски практики. Селектор на годинашната натпреварувачка програма е Сашо Огненовски.
Годинашната фестивалска програма обединува продукции од повеќе европски театарски средини. Во натпреварувачкиот дел се вклучени „Мојот театар“ на Ателје 212 од Белград, „Случај Вирџина“ на Кралскиот театар „Зетски дом“ од Цетиње, „Патувачкото казалиште Шопаловиќ“ на Сатиричното казалиште „Керемпух“ од Загреб, „Змеј“ на Местното гледалишче љубљанско и „Глембаеви“ на Националниот театар „Иван Вазов“ од Софија.
На Малата сцена, покрај „Хауситери“, придружната програма ги вклучува и „Животни линии: Блаватска – Фројд“ на Transversal Theater Company од Амстердам и „Прва љубов“ на Центарот за култура Жабљак. Со ова, продукцијата на Гостиварскиот театар е дел од програма што поврзува различни авторски пристапи и театарски искуства.