„Владата на ВМРО и ЗНАМ, предводена од Христијан Мицкоски, во полн интензитет продолжува да ја спроведува политиката која треба да ги отстрани Албанците од општествените текови, враќајќи ги на нивните периферни позиции од пред Рамковниот договор“, пишува Османи.
Тој го обвини Мицкоски за длабока нетолеранција кон Албанците, која според него се манифестира и на лично и на институционално ниво.
„Оваа политика на Мицкоски неретко ја гледаме како израз на неговиот личен карактер ‘ќе ги вадиме за уши’, ‘ќе им го покажеме местото’, но и во неговата професионална, или службена поставеност на отстранување на Албанците од концентричните кругови на неговото најтесно окружување: од неговиот личен Кабинет, преку најблискиот круг на административна поддршка во Владината зграда, па се до клучните Владини работни групи или во делегацијата на клучните работни посети“, истакнува Османи.
Како особено понижување за Албанците, Османи го наведе и доделувањето на ресорот за Охридскиот договор на, како што го нарече, „српскиот свет во земјава“.
„Како поинаку да се толкува доделувањето на клучната Владина позиција за спроведување, негување и унапредување на вредностите и придобивките од Охридскиот Рамковен Договор директно во рацете на Српскиот свет во земјава“, пишува Османи.
Тој предупредува и на низата други штетни чекори кои, според него, ја потврдуваат оваа политика: од укинувањето на Балансерот, преку маргинализацијата на Бадентеровиот механизам, до отстранувањето на Албанците од политиките на Централната банка и финансиските институции.
„Овие механизми – Бадентер, Балансер, јазична застапеност итн., – претставуваат механизми за заштита од мајоризација, и токму тие се најголемата пречка за спроведувањето на крајната радикална националистичка политика на Мицковски, ВМРО и ЗНАМ кон Албанците“, истакнува Османи.
Во обраќањето, тој укажа и на улогата на т.н. прокси играчи на Мицкоски, како Уставниот суд, ДИК, Централната банка и други тела, преку кои се реализира оваа стратегија. Според него, најбедна е позицијата на остатоците од ВЛЕН во Владата.
„Тие и самите се понижени и отстранети од масата кога Македонците носат одлуки, но уште потрагично, потоа мора да ја играат улогата на поданици – да ги спроведуваат, правдаат и да им даваат легитимитет на овие одлуки“, нагласува Османи.
Како одговор на сè ова, Османи порача дека овие избори се референдум за достоинството и еднаквоста на Албанците.
„Ова не е повеќе обична политичка битка. Ова е историски миг во кој Албанците мора да се изјаснат – дали ќе прифатат повторно да бидат неми набљудувачи додека ги бришат од системот? Дали ќе дозволат повторно да бидат ‘толерирани’ наместо вреднувани?“, прашува Османи.
Тој порачува дека Албанците нема да се откажат од европската перспектива на државата и ќе се спротивстават на секој обид за приближување кон антизападни геополитички центри.
„Албанците не сакаат да се откажат од европската иднина на оваа земја; не сакаат немо да гледаат како земјава се сели во прегратките на српскиот свет и кинеско – руските прегратки, туку сакаме да ја видиме како современа, прозападна земја, која е полноправна членка на НАТО и ЕУ“, истакнува Османи.
Обраќањето завршува со порака до сите кои, како што вели, не сфаќаат зошто овие избори се третираат како историски за Албанците.
„Не сфаќаат, ама наскоро ќе им се разјасни“, заклучува Османи.