Американскиот претседател Доналд Трамп oбјави дека е подготвен, доколку е потребно, да ги премести натпреварите од Светското првенство во 2026 година од градовите што ги смета за небезбедни во други градови.
„Светското првенство ќе биде безбедно. Доколку утврдам дека не е безбедно да се играат натпревари во одредени градови, ќе ги преместиме во други градови“, изјави Трамп.
Меѓу градовите што ќе бидат домаќини на натпреварите се демократските упоришта како Лос Анџелес (осум закажани натпревари), Сан Франциско (шест натпревари) и Сиетл (шест натпревари). Администрацијата на Трамп ја распореди Националната гарда оваа година за да го одржи редот во некои градови управувани од демократите, вклучувајќи го и Лос Анџелес, и покрај противењето на локалните власти.