Пехчево, 14 јануари – Градоначалникот на Општина Пехчево, Александар Китански, денеска ги посети младите пингпонгари од Македонската пингпонгарска репрезентација кои учествуваат на репрезентативниот камп што од 12 до 16 јануари се одржува во спортската сала „Јане Сандански“ во Пехчево.
На кампот учествуваат репрезентативци на возраст од 15 до 19 години, како и неколку помлади, перспективни пингпонгари. По посетата на тренингот, репрезентативците заедно со селекторот на националната репрезентација Милош Миленковиќ и тренерите Зоран Јовановски и Кристијан Станојковски беа на официјален прием кај градоначалникот Китански.
Градоначалникот изрази благодарност до Пингпонгарската федерација на Македонија за тоа што по втор пат организира камп за млади репрезентативци во Пехчево, нагласувајќи дека за општината претставува чест и задоволство што е домаќин на најталентираните пингпонгари од земјава. Тој истакна дека Општина Пехчево и во иднина ќе биде подготвена да обезбедува максимални услови за одржување на спортски кампови и подготовки.
Селекторот на Македонската пингпонгарска репрезентација, Милош Миленковиќ, се заблагодари за поддршката и условите обезбедени од општината, при што беа разгледани и можностите за организирање подолготрајни пингпонгарски кампови во Пехчево.
Средбата помина во позитивна и пријателска атмосфера, а младите репрезентативци добија скромни подароци од градоначалникот како спомен од Пехчево, ветувајќи дека со посветена и напорна работа достојно ќе ги бранат боите на Македонија.