Во градската населба СРЦ интензивно се работи на изградба на целосна комунална инфраструктура, со што оваа локација, која со години беше запоставена, добива услови за современо, безбедно и функционално домување, изјави градоначалникот на Делчево, Иван Гоцевски.
„Вложуваме во иднината на нашата општина и создаваме современи услови за живот на сите граѓани. Населбата СРЦ, според локацијата и новите градби, има потенцијал да биде украс на градот и затоа ја обезбедуваме целата потребна инфраструктура“, истакна Гоцевски.
Деновиве започна изградбата на водоводна, атмосферска и фекална канализација во населбата. Атмосферската канализација е во должина од 538 метри, фекалната 165 метри, а водоводната мрежа 304 метри. По завршувањето на подземната инфраструктура, ќе се изградат три нови улици – улица 5, улица 6 и улица 8, со вкупна должина од околу 400 метри.
Вкупната вредност на проектот изнесува 10.204.477 денари, средства обезбедени од Владата преку Министерство за транспорт и врски, а изведувач на работите е ДПТУ ОСД Кирил ДООЕЛ експорт-импорт Штип.
Изградбата на инфраструктурата во сите населби во Делчево, како што беше посочено, останува стратешки приоритет на локалната самоуправа и основа за рамномерен развој на урбаните зони и подобрување на квалитетот на живот на граѓаните.