Димитровски денеска присуствуваше на настан во Собранието каде беше прашан дали Владата ќе прифати влез на Бугарите во Уставот и другите помали заедници и дали има рок за влез во ЕУ.
„За жал, ниту од Европската Унија, ниту од земјите – членки, не постојат ниту напори, ниту предвидени рокови, кога земјите кандидати од Западен Балкан ќе ѝ се приклучат на Европската Унија“, рече Димитровски.
Тој рече дека е потребна предвидливост на европскиот пат, а смета дека земјата има се повеќе поддршка. Го спомна меѓу другото, претседателот на Европскиот совет Антонио Кошта, за кого било разумно тоа што нашата држава барала некакви гаранции.
„Јас се чудам зошто само на опозицијата не ѝ е разумно да бараме гаранции“, рече Димитровски.
Мораме достоинствено да ги почнеме преговорите и достоинствено да станеме членка на Европската Унија – порача Димитровски.
Во однос на влезот на Бугарите во Уставот и други етнички заедници, тој истакна дека нашата држава е шампион во човекови и малцински права и дека во Стразбур нема ниту една пресуда што се однесува на правата на Бугарите во Македонија, но дека државата мора да има гаранции дека нема да има понатамошно вета.
„Она што ја загрижува оваа влада и не само оваа влада, туку и мнозинството граѓани, 80 отсто од Македонците, 70 отсто од Албанците и она што сметаме дека во изминативе две години успеавме како Влада да наидеме на разбирање кај 99 отсто кај сите земји – членки, е дека навистина имаме проблем со тоа што ќе се случува денот по отворањето на Уставот, денот по влезот на Бугарите во Уставот. Дали ќе продолжат бугарските вета? И за тоа немаме гаранции. Немаме гаранција од Софија, напротив, имаме гаранции дека мораме да ги исполниме до последна точка сите преземени обврски, не само со преговарачката рамка, туку и со протоколите. Докрај. Онака како што се запишани, докрај“, рече Димитровски.
На денешната пленарна сесија 1 – „Моделот на вклучување на Собранието на Република Северна Македонија во процесот на пристапување кон ЕУ“, на прашања покрај Димитровски, одговараа собранискиот претседател Африм Гаши, заменик-претседателката на СДСМ – Фани Каранфилова-Пановска, Марија Ристеска – извршна директорка на Центарот за истражување и креирање политики – ЦРПМ, како и Гордан Георгиев – поранешен пратеник и претседател на Форумот за разумни политики.
На утрешната пленарна сесија 2 – „Работните тела на Собранието на Република Северна Македонија и процесот на пристапување кон ЕУ“, најавено е на прашања да одговараат Беким Сали – прв заменик-претседател на Владата и министер за европски прашања, Венко Филипче – претседател на Националниот совет за евроинтеграции, Ели Панова – членка на Комисијата за европски прашања, Бујар Османи – поранешен министер за надворешни работи, како и Цветанка Иванова – поранешна генерална секретарка на Собранието.