Премиерот Христијан Мицкоски очекува кандидатот на ВМРО-ДПМНЕ на предвремените локални избори во Брвеница да освои над 4.000 гласа во вториот круг, откако во првиот круг партијата добила околу 3.000 гласа и предност од приближно 800 гласа пред кандидатот на Демократската унија за интеграција (ДУИ).
Мицкоски оцени дека изборниот резултат претставува значајна победа за ВМРО-ДПМНЕ во Полошкиот регион. Тој наведе дека разликата во однос на кандидатот на СДСМ е поголема од четири спрема еден и изрази очекување за дополнително зголемување на поддршката во пресрет на вториот круг, закажан за 1 ноември.
„Благодарност до граѓаните на Брвеница кои излегоа и ја поддржаа победата на ВМРО-ДПМНЕ со некаде околу 3.000 гласа. Очекувам таа бројка по вториот круг да се искачи на рекордни над 4.000 гласа“, изјави Мицкоски.
Тој им се заблагодари на граѓаните што го поддржале кандидатот на партијата, нагласувајќи дека ВМРО-ДПМНЕ се потпира на гласовите од сите етнички заедници во општината, без разлика на етничката припадност.