ДЕЛЧЕВО – Буџетот на Програмата за образование на Општина Делчево за 2026 година е зголемен за 250.000 денари и е целосно насочен кон поддршка на талентирани ученици и студенти, со што локалната самоуправа прави значаен чекор кон унапредување на образованието и мотивацијата кај младите.
Со новата програма, општинските стипендии и награди се зголемени, при што износот на наградите порасна од 500 на 1.000 денари, а за првпат се воведува и еднократна парична награда за првенците на генерација – 20.000 денари за основно и 30.000 денари за средно образование.
Во делот на стипендиите за талентирани ученици од семејства со ниски приходи, планирани се 10 стипендии со месечен износ зголемен од 1.500 на 2.000 денари. За учениците со особено висок успех се предвидени 8 стипендии, при што износот е зголемен од 2.000 на 2.500 денари месечно.
Зголемување има и кај студентските стипендии. За студентите од семејства со ниски приходи стипендијата се зголемува од 2.000 на 2.500 денари, додека за талентираните студенти од 3.500 на 4.000 денари. Стипендијата за ученик со попреченост исто така е зголемена од 1.500 на 2.000 денари.
Во рамки на мерките за поддршка и наградување, Општина Делчево предвидува и ваучери во износ од 20.000 денари за 15 најдобри матуранти од СОУ „М.М. Брицо“, како признание за постигнатите резултати во средното образование.
Зголемена е и еднократната финансиска поддршка за запишани првачиња во основните училишта, од 3.000 на 4.000 денари. Дополнително, наградите за најдобрите ученици Роми се зголемени – за основците од 5.000 на 6.000 денари, а за најдобриот ученик Ром во средно образование на 11.000 денари.
Градоначалникот Иван Гоцевски истакнува дека со Програмата за образование за 2026 година општината вложува таму каде што има најголема вредност – во младите и нивната иднина.
„Со овие мерки испраќаме јасна порака – трудот се препознава, знаењето се поддржува, а успехот се вреднува. Ќе продолжиме да создаваме услови во кои секое дете ќе има можност да напредува и да ја гради својата иднина тука, во Делчево“, нагласи Гоцевски.
Јавниот конкурс за доделување на општинските стипендии ќе биде распишан во текот на овој месец.
