ДЕЛЧЕВО – Првите снежни врнежи за оваа зима кои денеска ги зафатија улиците во Делчево ги мобилизираа екипите на ЈКП „Брегалница“. Од претпријатието информираат дека се целосно подготвени да реагираат согласно своите надлежности, утврдени со Планот за долгорочно зимско одржување на општинските патишта и улици на подрачјето на Општина Делчево за 2026 година.
Активностите на ЈКП „Брегалница“ се однесуваат на одржување и чистење на тротоарите и јавните површини, а механизацијата со која располага претпријатието е во исправна состојба и подготвена за интервенција доколку снежните врнежи продолжат со поголем интензитет.
Зимското одржување на општинските улици и патишта во Делчево го врши фирмата „СД-Транс – Ѕвегор“, избрана по спроведена јавна набавка. За таа намена, Општина Делчево има обезбедено средства во износ од 354.000 денари, со вклучен данок на додадена вредност.
Согласно Планот и утврдената приоритетна листа, со зимското одржување се опфатени 88,5 километри патишта со асфалтен коловоз, 42 километри патишта со макадам и 39,83 километри општински улици со асфалтен коловоз. Надзорот над извршените активности го врши Одделението за инспекциски надзор при Општина Делчево.
Чистењето на снегот од коловозите започнува пред снежната покривка да достигне 10 сантиметри на сообраќајниците од прв и втор приоритет, односно 15 сантиметри кај останатите улици и патишта. Посебно внимание се посветува на критичните делници како остри кривини, стрмни косини, мостови, поголеми надолжни нагиби, засенчени делови, како и на патни премини и вкрстувања.
Зимското одржување на регионалните и магистралните патишта на територијата на Општина Делчево е во надлежност на Јавното претпријатие за одржување на магистрални и регионални патишта.
