Албанската новинска агенција ИНА, повикувајќи се на документите на ЦИА, ја открива внимателната дипломатска игра на Глигоров во раните 1990-ти години.
Во документ од ноември 1992 година, од кој е тргната ознаката на тајност, се изнесуваат детали за тоа во која насока се движела Македонија како новоформирана држава по отцепувањето од поранешна федерална Југославија, со новиот лидер, кој доаѓал од Белград.
„Во време кога регионот тонел во крвопролевање, Глигоров успеал да маневрира меѓу силните притисоци од Грција, ризикот од Белград и внатрешните етнички тензии со Албанците. Во разузнавачките извештаи тој е опишан како ‘мудар реформатор’ со извонредно владеење на стратегиските детали“, пренесува ИНА.
Сепак, она што најмногу им оставило впечаток во ЦИА е што Глигоров одбил 100 милиони долари од Грција за да се купи името на Македонија.
„Документот открива изненадувачка заднина: и покрај итната потреба од економска помош, Глигоров одбил приватна понуда од грчки функционери во износ од 100 милиони долари, со услов да се смени името на државата. Претседателот ги оценил грчките барања како целосно неразумни, изјавувајќи дека Македонија никогаш нема да ги прифати. Тој инсистирал дека републиката дала доволно докази дека нема територијални претензии кон соседите, истовремено изразувајќи длабоко разочарување од Европската заедница, која ја поддржувала грчката вето-политика“, пренесува ИНА.
Во документите на ЦИА на кои се повикува ИНА се оценува дека на регионален план, Глигоров имал многу внимателен однос кон Белград.
Иако се обидувал да одржи комуникација со лидерите од поранешна Југославија, тој решително ги одбил обидите на српскиот претседател Слободан Милошевиќ да го убеди да формира асоцијација со преостанатата југословенска држава доминирана од Србија. Како што пренесува албанската агенција, документите потврдуваат дека Глигоров немал доверба во Милошевиќ и дека го сметал, заедно со хрватскиот претседател Фрањо Туѓман, за главен одговорен за крвавата југословенска криза. Наспроти тоа, тој воспоставил блиска соработка со претседателот на Босна, Алија Изетбеговиќ, со кого бил во постојан контакт за координација на чекорите за заштита на суверенитетот.
Во разузнавачката анализа на ЦИА, за последната деценија на 20 век на Балканот, се оценува дека одржувањето на внатрешната стабилност било најтешката задача за Глигоров, со оглед на тензиите меѓу големата албанска етничка заедница и десничарската партија ВМРО-ДПМНЕ.
„Неговата стратегија се темелела на нагласување на индивидуалните права на граѓаните, наместо на колективните права – пристап што бил прифатен од умерените албански лидери, иако тие ја обвинуваа Владата за недостиг од чувствителност. Се смета дека авторитетот на Глигоров бил клучниот фактор што ја одржувал кревката владина коалиција во која учествувале и албанските партии. За да ги ограничи радикалните струи во ВМРО, тој паралелно работел на зајакнување на врските со Бугарија и Турција, а воедно барал политичка поддршка од големите сили како САД, Британија и Франција“, пишува ИНА.
Освен анализата на тогаш актуелните политики на македонскиот претседател Киро Глигоров, документот на ЦИА содржи и детали од неговата биографија, опишувајќи го како „политичар и технократ што со децении служел на највисоките финансиски и извршни функции во федерална Југославија“.
The post ЦИА со почит за Глигоров што одбил 100 милиони долари од Грција за да се купи името на Македонија appeared first on МКД.МК.