Машката одбојкарска репрезентација на Македонија влегува во финалните подготовки пред стартот на новото издание на Европската лига 2026. Селекторот Јошко Миленкоски и неговите избраници по враќањето од Подгорица се стационираа во Струмица, каде продолжија со тренинзи и тактички подготовките за првите два меча во новата сезона на силното европско натпреварување.
Македонија веќе в петок во салата „Парк“ ја очекува првиот голем предизвик. Силната селекција на Холандија е првиот ривал на „жолто-црвените“ на турнирот во Струмица, каде викендов (во недела) ќе го одиграме и вториот меч, против репрезентацијата на Луксембург. Македонија сериозно ослабена без еден од најдобрите одбојкари во националниот тим, Александар Љафтов, ќе се обиде да влезе во Европската лига со резервирани очекувања.
„Повредата на Љафтов е голем проблем. Тој е еден од столбовите врз кои се темели оваа селекција. Влеговме во одлична форма, полека ја финализиравме подготовката и се случи таа повреда. Сега останува да ги кренеме главите и да бараме други солуции. Пред нас се два исклучително тешки натпревари“, потенцира селекторот Миленкоски.
Мечот со „лалињата“ во петок во салата „Парк“ стартува во 19 часот.