Најавата дека Грција в сабота ќе ѝ предаде на Бугарија посмртни останки за кои се смета дека му припаѓаат на цар Самоил предизвика остри реакции во Македонија. Македонски историчари го оспоруваат степенот на сигурност со кој се утврдува кому му припаѓаат коските и предупредуваат дека договорот меѓу Атина и Софија ќе се користи и за политички цели.
Од македонската Влада за ТВ 24 изјавиле дека станува збор за билатерален договор меѓу две суверени држави. Според Владата, ваквите потези дополнително покажуваат зошто Македонија треба достоинствено да ги штити својот идентитет, јазик и историско наследство. Оттаму порачуваат дека ќе продолжат да водат политика на заштита на македонскиот идентитет, без оглед на одлуките што други држави ги носат во своите меѓусебни односи.
Историчарот и професор Стојко Стојков, во изјава за ТВ 24, вели дека не постои доволен научен доказ дека останките навистина се на Самоил. Според него, нивното предавање нема научно значење, но може да добие силна пропагандна употреба. Тој предупредува дека, доколку во иднина биде откриен друг гроб за кој ќе се утврди дека е на Самоил, сегашната церемонија би можела да се претвори во голем срам. Стојков смета и дека ова не е првпат историски симболи да се користат за политички цели без доволно внимание на прашањето за нивната автентичност.
Со иронична реакција се огласи и професорката Виолета Ачковска од Институтот за историја. Таа го критикува начинот на кој размената на историски предмети и останки се претставува како гест на добрососедство и оценува дека во случајов се потиснуваат прашањата за доказите и за македонското историско наследство.
Софија и Атина, пак, договорот го претставуваат како историски. Бугарскиот премиер Румен Радев изјави дека тој е резултат на интензивни преговори и дека Бугарија шест децении се обидувала да ги добие останките. Официјалното предавање е најавено за 3 октомври во Музејот на византиската култура во Солун.
Останките биле пронајдени во 1965 година при археолошки ископувања во базиликата „Свети Ахил“ во Мала Преспа. Грчкото Министерство за култура ги претставува како идентификувани останки на цар Самоил. Договорот опфаќа и предавање на друг антрополошки материјал од базиликата, додека Бугарија треба да ѝ врати на Грција 48 религиозни и културни предмети пренесени во Софија во 1917 година.
ТВ 24 објави дека побарале коментар и од македонската историска комисија, но до објавувањето на нивниот прилог не добиле одговор.