Судскиот совет на денешната седница избра претседатели на три основни судови — во Гостивар, Дебар и Свети Николе. Советот ги разгледа и пријавите за раководните места во Апелацискиот суд Скопје и Основниот суд Струга, но за тие два суда сè уште не е донесена одлука за избор.
На чело на Основниот суд Гостивар е избран Мирослав Петровски, кој досега ја вршеше функцијата претседател. Неговата пријава била навремена и придружена со комплетна документација.
Во постапката за гостиварскиот суд учествувал и Елејса Алији. На седницата, меѓутоа, било посочено дека за него претходно е донесена одлука за исполнување на условите за старосна пензија. Пријавата на третата кандидатка, Драгослава Веселиновска, не била комплетна бидејќи не доставила акциски план за спроведување на програмата за работа.
За претседател на Основниот суд Дебар е избран Оруч Абазовски. За истата функција се пријавил и Мерсим Марку, но Судскиот совет утврдил дека тој не ги исполнува условите за избор, бидејќи веќе двапати претходно бил избран за претседател на овој суд.
Основниот суд Свети Николе ќе го раководи Валентина Буровска. Таа била единствената пријавена кандидатка на огласот.
Двајца кандидати за Апелацискиот суд Скопје
На истата седница Судскиот совет ги усвои извештаите на комисијата што ја проверувала навременоста на пријавите и комплетноста на документите за претседателските места во Апелацискиот суд Скопје и Основниот суд Струга.
За Апелацискиот суд Скопје се пријавиле судиите Зоран Герасимовски и Лидија Зимбовска. За претседател на Основниот суд Струга единствен кандидат е Танче Петревски. Според усвоените извештаи, сите три пријави се навремени и комплетни, па кандидатите продолжуваат во следната фаза од постапката. Тоа значи дека претседатели на овие два суда допрва ќе се избираат.
Судскиот совет го усвои и извештајот од работната посета на Основниот кривичен суд Скопје.
