Министерот за дигитална трансформација, Стефан Андоновски, втора година по ред учествува на престижниот самит Импакт во Букурешт, заедно со министри од владите на Романија и Полска, пратеници во Европскиот парламент како и директори на водечки меѓународни компании од телекомуникацискиот и банкарскиот сектор.
На панелот „Европската сувереност во вештачката интелигенција: може ли ЕУ да биде конкурентна и да предводи?“, Андоновски истакна дека европската конкурентност ќе зависи од способноста вештачката интелигенција да се примени во економијата и јавниот сектор, со вложувања во инфраструктурата и вештините на луѓето.
„За Југоисточна Европа, трката во областа на вештачката интелигенција не се сведува на тоа кој ќе го изгради најголемиот модел. Станува збор за тоа кој најбрзо ќе ја усвои вештачката интелигенција, ќе ја поврзе со реални проблеми во економијата и јавниот сектор и ќе им обезбеди на луѓето инфраструктура и вештини за натамошна надградба врз таа основа. Европа може да биде предводник, но сега треба да направиме чекор напред: од регулирање на економијата заснована на вештачка интелигенција, кон нејзино масовно проширување и развој“, истакна Андоновски.
Министерот посочи дека пошироката примена на вештачката интелигенција е еден од најголемите предизвици, но истовремено и значајна можност за земјите од регионот. Според него, регионалната соработка може да ги надмине ограничувањата на поединечните пазари и да создаде попривлечни услови за инвестиции и технолошки развој.
„Поединечно, нашите пазари се релативно мали. Заедно, можеме да им понудиме на инвеститорите регионален пазар, силен инженерски кадар, конкурентни трошоци и сè пософистицирана дигитална инфраструктура. Би се фокусирал на соработка во три области: заедничка инфраструктура, заеднички примери за примена и полесно движење на таленти и компании“, порача Андоновски.
Осврнувајќи се на европскиот пристап, министерот нагласи дека регулативата има важна улога во воспоставувањето доверба и јасни правила, но дека следниот чекор мора да биде забрзана примена на технологијата и поддршка за иновациите.
„Европа веќе е лидер во областа на регулативата. Вистинското прашање е дали сега можеме да станеме и лидери во имплементацијата и иновациите. Регулативата беше неопходна за воспоставување доверба и правила на игра. Но, сама по себе, регулативата не создава компании, модели ниту продуктивност“, истакна министерот.